Norsk 2

Norsk 2
Studieplan 30 studiepoeng

Høgskolen i Nesna
Godkjent av dekan: 16.5.2008

1 Innleiing

Norskstudiet i allmennlærarutdanninga kvalifiserer, saman med andre fag og praksis, for lærararbeid i grunnskolen, samstundes som det skal gi grunnlag for vidare studium i norsk. Som morsmålsfag står norskfaget sentralt i opplæringssystemet. Språket legg grunnlaget for kommunikasjon, tenking og læring, og arbeidet med språk og tekstar formidlar kulturarv og danningsgrunnlag i samfunnet vårt. Denne fagplanen byggjer på Rammeplan for allmennlærarutdanning (2003).

Studiet skal gi djupare innsikt i arbeidet med språk, tekst og litteratur. Perspektivet blir utvida ved at studiet gir eit historisk oversyn som gir grunnlag for å reflektere over samspelet mellom tekst, tid og omgivnader.

2 Mål

2.1 Læringsmål
Studiet er sett saman av tre målområde som utfyller og grip inn i kvarandre:
- Kunnskap om språk og tekst
- Språk og tekst i undervisningsperspektiv
- Arbeid med språk og tekst
Studentane skal ved å arbeide med desse tre målområda få eit grunnlag for å bli gode norsklærarar: Dei skal få utvikle seg som språkbrukarar, dei skal tileigne seg allsidig kunnskap om språk og tekst, og dei skal utvikle fagdidaktisk innsikt ut frå teoretisk kunnskap og praktisk erfaring med norskundervisning.

2.2 Målgruppe
Målgruppa er studentar i grunnutdanninga, lærarar og andre med studiekompetanse og interesse for norskfaget.

2.3 Opptakskrav
Opptakskravet er Norsk 1 eller tilsvarende.

3 Innhald

Innhaldet er organisert i fem faglege hovudemne. Det er ei sams avsluttande vurdering for heile studiet.

3.1. Hovudemna er desse:

Språkkunnskap
- Norrønt språk
Studentar skal kunne lese og omsetje 2 sider norrønt språk i original og kunne gjere greie for grammatiske ting i tekstane og kva som kjenneteiknar norrønt språk samanlikna med moderne norsk.
- Språkhistorie
Studentane skal kunne gjere greie for hovudlinene og dei viktigaste språkendringane i norsk språkhistorie frå urnordisk og fram til 1830 og vite kva som skil norsk frå svensk og dansk.
- Talemål og skriftspråk
Studenten skal kunne beskrive eit talemål ved å bruke språklege omgrep frå fonologi og morfologi. Studenten skal kunne forklare særtrekk ved norsk språk, samanlikna med eit anna språk med grammatiske omgrep (språktypologi).
- Studentane skal meistre praktisk nynorsk og bokmål

Litteraturlesing - eldre litteratur
I kva grad skolen har eit ansvar for å formidle kulturarven er ei didaktisk problemstilling. For å kunne delta i ein slik diskusjon må læraren sjølv kjenne den eldre litteraturen og kunne setje denne inn i ein litteraturhistorisk samanheng
Studenten skal lese ei islendingesoge, ein komedie av Holberg, ei bondeforteljing av Bjørnson, to bøker frå 1870- eller 1880-talet og ei bok frå 1890-talet. I tillegg kjem eit utval av korttekstar. (Ein viser her til pensumlista)

Nyare litteratur
Lesing og tolking/ vurdering av:

• 2 romanar for vaksne
• 2 ungdomsbøker
• eit utval korttekstar

Nordnorsk litteratur / regionallitteratur

• Ei samling korttekstar som illustrerer historiske linjer og sjangrar i nordnorsk litteratur
• To nordnorske romanar
• Ein individuelt vald nordnorsk roman som skal presenterast munnleg
• Didaktisk refleksjon rundt bruk av regional litteratur

Norskdidaktiske emne

• Norskfaget i Kunnskapsløftet (LK06)
• Arbeid med elevteksten, vurdering
• Sjangerskriving
• Samansette tekstar (multimodale tekstar)
• IKT og norskfaget

3.2 Didaktikk/ profesjonsretting
Eit av hovudemna er eit reint didaktisk emne. Men didaktikk er og ein del av dei andre emna. Norsk 2 har fagstoff som ein særleg har bruk for på ungdomssteget og i vidaregåande skole.

3.3 Praksis
Studentar som tar dette studiet som skolefag (minimum 60 studiepoeng skolefag) i valbar del av allmennlærarutdanninga etter Rammeplan av 2003, skal ha 4 veker overtakingspraksis med vekt på valte skolefag og tverrfagleg samarbeid. Praksisgruppene blir sette saman slik at gruppa til saman kan dekkje fleire fagområde. Kvar student skal få mest mogeleg erfaring med å undervise i dei valte skolefaga sine, og i tverrfagleg samarbeid.
Ein viser dessutan til plan for praksis i samla plan for allmennlærarutdanninga.
Studentane som ikkje følgjer allmennlærarutdanninga, har ingen praksiskrav.

3.4 Forskingsorientering /Fou
Undervisninga byggjer på lærarane si eiga og andre si forsking. Gjennom utviklingsarbeidet får studentane erfaring med ein forskingsbasert arbeidsmåte.

3.5 IKT /Kunnskapsløftet
IKT og Kunnskapsløftet blir tatt opp i studiet. IKT blir nytta som reiskap i studiet - til informasjon, kommunikasjon og formidling over nett og innlevering av oppgåver.

3.6 Likestilling /fleirkulturelt perspektiv
Likestilling blir tatt opp i litteraturen som studenten les. Det fleirkulturelle perspektivet kjem inn i emnet nordiske språk og i emnet språktypologi.

3.7 Kontaktflater til andre fag
Nordnorsk litteratur, har i seg mykje historie og samfunnsfag. Språktypologi tangerer andre språk. Norskfaget har fleire berøringspunkt med pedagogikk.

4 Organisering og arbeidsformer

4.1 Organisering
Studiet er oppdelt i fem faglege hovudemne. Studiet er lagt til 6 vekesamlingar à 4 dagar.

4.2 Arbeidsformer
Norskfaget er eit omfattande fag, og ikkje alle emna kan dekkjast gjennom den timeplanfesta undervisninga. Denne undervisninga er hovudsakleg organisert som forelesing og seminar. Ein legg stor vekt på samspelet mellom teoretisk kunnskap, refleksjon og eigne erfaringar med å uttrykkje seg i ulike sjangrar. Difor må studentane rekne med å delta aktivt i seminartimane med praktiske tekstoppgåver, framlegg og drøfting. Studentane vil få høve til individuell rettleiing i samband med ulike former for oppgåver.

5 Deltaking og arbeidskrav

5.1 Obligatorisk deltaking
Det er i prinsippet obligatorisk frammøte på samlingane. Fråvær må meldast til koordinator og grunngjevast.

5.2 Arbeidskrav
Det er eit obligatorisk krav at:
- studenten leverer to skriftlege innleveringar i løpet av året til godkjent vurdering.
- studenten held eit individuelt munnleg framlegg knytt til nordnorsk litteratur
- leverer inn eit forslag til problemstilling på sitt utviklingsarbeid og leverer sjølve utviklingsarbeidet til dei fristar som går fram av semesterplanen.

Utviklingsarbeidet skal ha eit omfang på 10 - 15 sider maskinskrivne sider, med normal linjeavstand.

6 Vurdering og Eksamen

6.1 Vurdering
Sjølve studiet skal vurderast, og studenten skal vurdere seg sjølv og bli vurdert.

6.2 Eksamen
Den avsluttande vurderinga byggjer på:
- Ein individuell skriftleg skoleeksamen på 8 timar (ekstern sensor)
- Eit individuelt fagleg utviklingsarbeid (intern vurdering)

Studenten skal skrive bokmål på den eine eksamensoppgåva og nynorsk på den andre. Dette bestemmer studenten sjølv. Dei to skriftlege eksamenskomponentane tel kvar 50% av den endelege eksamenskarakteren. Kvar komponent må vere vurdert til bestått. Det blir nytta bokstavkarakterar. A-E for godkjent, F for ikkje godkjent.